مصادر المحتوى:
اذا عرفت من وين تجيب المحتوى بيسهل عليك الموضوع، وبتعرف تجيبه وبعدها تقدمه.
- منقول: وهذا هو انك تنقل مثلا ً دعاء او حكمة او بيت من قصيدة وغيرها.
- مقتبس معدل “مسروق بذكاء”: وهذا خطير شوي، لانك لو ما عرفت تغير فيه زين بتنفضح، وهو طبعا ً انك تسرق فكرة او قصيدة او مثل ..الخ وتلعب فيها بطريقتك.
- ابداعي: وهو اللي تجيبه من راسك.
أساليب المحتوى
اعتبر نفسك تسولف مع شخص، وش الاسلوب اللي بتتخده معه ؟
- عاطفي: تخاطب فيه مشاعر الشخص، تجيه من ناحية عائلته او اطفاله، وتؤثر فيه.
- اجتماعي: تظهر فيه مسئووليتك المجتمعية وجانبك الانساني.
- مباشر: تعطيه من الاخر وتعلمه انه واجب عليه يفعل كذا وكذا، وخطأ يفعل كذا وتراها تعتبر مخالفة.
اقسام المحتوى
حسابك مهم تقسمه وتخليه متنوع عشان ما يصير على رتم واحد ومتابعينك يملون منه.
- اعلاني: تعلن من خلاله عن مستجداتك، مثلا اطلقت خدمة جديدة، منتج جديد.
- تثقيفي: تعطي في معلومات تفيد فيها متابعينك، سواء بنفس مجالك او معلومات عامة عن موضوع معين متداول حاليا ً.
- ترويجي: تروّج عن طريقة لعلامتك التجارية او منتجاتك.
- تفاعلي: هو اللي تتفاعل فيه مع متابعينك، سواء بسؤال او استفتاء، منشور كوميدي تمازحهم فيه، بس خلك حذر وانت تصنعه.
أنواع اللغات
ونقدر نسميها اللهجات، وهي على حسب جهتك وجمهورك المستهدف يتم تحديد اللغة المستخدمة.
- رسمية: هي اللغة الرسمية المستخدمة في المملكة.
- بيضاء: اللغة اللي تقريبا ً الكل يفهمها، بدون ما تكون متحيزة لمنطقة معينة وغير صحيح كما يشاع انها هي النجدية، لأن مو كل مصطلحات اهل نجد يفهمونها اهل بقية المناطق.
- عامية: هي اللي تكون تناسب اهل المنطقة اللي تخاطبهم، اهل نجد لهم لغتهم، واهل الغربية لهم لغتهم وهكذا.
تمارين بسيطة
اي مجال له تمارين تقدر من خلالها تطوّر وتتعلّم اكثر.
- القراءة: توسع مداركك وتزيد من حصيلتك المعرفية ومصطلحاتك وتكتشف طرق تفكير جديدة وتكنيكات في الصياغة.
- الكتابة: اكتب اي شيء، ذكريات، خواطر، نقد، لو تكتب وش سويت اليوم، وبكذا انت تحافظ على لياقتك في الكتابة وقوة صياغتك.
- الاطلاع المستمر: اطلاعك هو اللي بيخليك تتعلم أشياء جديدة وتستلهم من غيرك، وتعرف الناس وين متجهة.
- صياغة الفكرة بأكثر من طريقة: وهذه ترفع من مستوى مهارتك في الكتابة، ويصير عندك عدة تكنيكات.
مثال:
الفكرة: (الطعم خطير)
- تاكل أصابعك وراه.
- لازم تعد صوابعك بعد ما تاكله.
- تبي أصابعك؟ اجل ما ننصحك تأكله.
#محتوى_رقمي
#صناعة_المحتوى_الرقمي
#content_creators
